kodikkulam sukumaranപന്തിരുകുലത്തിന്റെ അമ്മ
അറിയുമോ നിങ്ങളിപ്പറയിയെ-ഭാരതം
നിറമാല ചാർത്തിയൊരെന്നെ
അറിവെത്ര നേടിയിട്ടും ഫലമില്ലാതെ
അലയുകയാണു ഞാനിന്നും
പാരതന്ത്ര്യത്തിൻ കുരുക്കിലകപ്പെട്ട്‌
പാപം ചുമക്കുന്നൊരമ്മ
ഭർത്താവ്‌ ദൈവമായ്‌ക്കാണുന്ന ഭാരത
സംസ്കൃതി ചേർന്നുള്ളൊരമ്മ
പാണ്ഡ്യത്ത്യ ഗർവ്വിന്റെ പഞ്ചാഗ്നി ജ്വാലയിൽ
വെന്ത മനസ്സിന്നുടമ
നൊന്തുപെറ്റോരു കുഞ്ഞിനെ വഴിവക്കി-
ലെന്നുമുപേക്ഷിക്കുമമ്മ
പ്രസവിച്ച കുഞ്ഞിനെ പ്പാലൂട്ടുവാൻ
ഭാഗ്യമനുവദിക്കാതുള്ളൊരമ്മ
അഗ്നിഹോത്രിക്കുള്ളൊരമ്മ
ദേശാടന ഭിക്ഷുകിയായലയുന്നു
എന്റെ മോൻ ചത്തപശുവിൻ മുല നട്ട്‌
മണ്ണിൽക്കനി വിളയിച്ചു
പഞ്ചലോഹങ്ങളുരുക്കിക്കുടിക്കുന്ന
മന്തുകാലൻ മറ്റൊരുത്തൻ
നിങ്ങളറിഞ്ഞോ പെരുന്തച്ചനും വളർന്നീ-
ഗർഭപാത്രത്തിലെന്ന്‌
ചാത്തൻ, രജകനും, വള്ളോനും നായരും
കൂട്ടത്തിലുപ്പുകൂറ്റനും
നാടിൻ കഥ പാടിനീങ്ങുന്ന പാണനും
ഈയമ്മ പെറ്റതാണെന്ന്‌
ദേവിയാം കാരക്കലമ്മക്കു മാതാവ്‌
ദേശാടനത്തിലാണിന്നും
വായില്ലാക്കുഞ്ഞിനെപെറ്റെങ്കിലുമവൻ
നാടിനു ദൈവമാണിന്നും
എന്നുമൈതിഹ്യങ്ങളെന്റെ പിന്നാലെ വ-
ന്നെല്ലാം തെരഞ്ഞിരുന്നല്ലോ
പന്ത്രണ്ടു മക്കളെപെറ്റഞാൻ പാതിയും
വെന്ത മനസ്സിന്നുടമ
പന്ത്രണ്ടു ദീപങ്ങൾകൊണ്ട്‌ വിശ്വസ്നേഹ
സഞ്ചിക തീർത്ത പറയി
മരവിച്ച മണ്ണും മനുഷ്യനും ജീവിത
ഹൃദയസ്വപ്‌നങ്ങൾ മറന്നോ
പറയി തൻ സംസ്ക്കാരപൈതൃകം പോലു-
മിന്നറിയാത്ത മലയാളമെന്നോ?
ഇനിയും മരിക്കാത്ത ജാതിപിശാചിനെ
കുരുതികൊടുക്കുക നിങ്ങൾ
ഉണരട്ടെ കേരളം,ഭാരതം,ജീവിത
ത്തുയിലുണർത്തീടട്ടെ ലോകം
