Followers

Sunday, September 29, 2013

അവതാരിക തേടുന്ന - ആരതിയുടെ കവിതകൾ .............................................

ടി.സി.വി. സതീശൻ

അടുപ്പിൽ
അരി തിളച്ചുമറിയുമ്പോഴാണ്
ആരതിക്ക്
ഉള്ളിലൊരു കവിത വന്നത്

അടുപ്പൂതിക്കെടുത്തി
ആരതി
ശയനമുറിയിലേക്കു നടന്നു
ശയനമുറിയിൽ
ക്ലോക്ക് സമയം തെറ്റി -
മാറാലയിൽ
കഴുത്തുനീട്ടി ഞെരുങ്ങുന്നു

അരിവെന്തു കഞ്ഞിയായിരിക്കുന്നു
കവിത വെന്തു കഞ്ഞിയാവാതെയും
മാറാലയിൽ -
നിലച്ച ക്ലോക്കാവതെയും നോക്കണം

അവൾ
എഴുത്തു മുറിയിലേക്ക് ചെന്നു
അടഞ്ഞു കിടക്കുന്ന ജനൽ വാതിലുകൾ
നരിച്ചീറുകൾ കലപില കൂട്ടുന്നു
കവിത നരിച്ചീറുകൾക്ക് തീറ്റയാകരുത്
അകമുറിയിൽ കാറ്റും വെളിച്ചവും കേറണം

ആരതി
മുറ്റത്തേക്കിറങ്ങി
ഉച്ചവെയിലിനു മഞ്ഞ നിറം
ഇലകളനങ്ങാത്ത -
ഇമകളനങ്ങാത്ത ഗ്രഹണി കാലം
മനസ്സ് നിശ്ചലം ..
കവിതയെ പാമ്പ് വിഴുങ്ങിയോ ?

പകൽ സൂര്യനെ നോക്കി ..
നീലാകാശത്തെ നക്ഷത്രങ്ങളെ നോക്കി
ആരതിയുടെ ചുണ്ടുകൾ കേണു,
ഇനിയും എഴുതിത്തീരാത്ത -
എന്റെ കവിതയ്ക്ക് ഒരു അവതാരിക