ശത്രു

satheesan iritti
പായുമീഘടികാരംനിൽപതെന്നിനി
ക്കാലചക്രത്തിൻ കിതപ്പല്ലോ
കേൾപ്പതെൻ കർണ്ണങ്ങളിൽ!

വറ്റുവതെന്റെ ഗ്രാമപ്പുഴകൾ
തലകൊയ്തുതീർപ്പതെൻ നാടിൻവശ്യ-
സൗന്ദര്യത്തലപ്പാവുകൾ!

വിണ്ടുകീറുവതെന്റെ പാടങ്ങളതിൽ-
പ്പൊങ്ങിനിറയുംനിറംപൂശി
ശീതളമണി സൗധങ്ങൾ!

സ്നേഹത്തിനർത്ഥംമാറി, അനുരാഗത്തി-
നർത്ഥം കുടിച്ചുവറ്റിക്കുന്ന
ചാരിത്ര്യം തെരുവിൽപ്പോലും!

അമ്മവേണ്ടച്ഛൻവേണ്ട, പഴഞ്ചൻപാഴ്‌-
വസ്തുക്കൾ, കാശിന്റെ വലിപ്പത്തിൽ
ഗോഡൗണിൽ സൂക്ഷിപ്പുനാം!

കരയും കണ്ണീരിനും നിറമുണ്ടതിൻ-
പ്പാറിപ്പറക്കും മനസ്സിലെ
രാഷ്ട്രീയപ്പതാകകൾ

നിന്റെവേദനഎന്റേതല്ല
നീചിരിച്ചാലും കരഞ്ഞുകണ്ണീർ
ച്ചാലിൽനീന്തിക്കളിച്ചാലും
എന്തിനുസഹിക്കണംഞ്ഞാനില്ലകൂടെ-
യതുനിന്റെ ചെയ്തിതൻഫലം
നിന്റെ കർമ്മത്തിൻ ഗുണം

ചോരയ്ക്കും മതമുണ്ട്‌
മദത്തിൻപുതപ്പുണ്ട്‌ കണ്ണുനീർ
മഴകൊണ്ട്‌ വിറച്ചുകിടന്നാലും
മാറാത്തവികാരത്തിൻ
കാരിരുമ്പുറയുണ്ട്‌!

'വസുധൈവകുടുംബകം'
പാടുവാനെനിക്കെന്റെ
ധർമ്മബോധത്തിൻ വീണ
ക്കമ്പികളടർന്നുപോല്‌!

'അഹിംസപരമോധർമ്മ'മെന്നു
പാടിയച്ചുണ്ടിൽ ഹിംസതൻരക്തക്കറ
വാർന്നുവാർന്നൊഴുകുന്നു
സ്വധർമ്മംകാട്ടിത്തന്ന വഴിയിൽ
കിടപ്പാണിഅഹിംസതൻപ്രവാചകൻ
ഗാന്ധിജി വെടിയേറ്റ്‌.
കീശയിൽ ചില്ലിക്കാശ്നിറയ്ക്കാൻ
സുഭിക്ഷമായുണ്ണുവാനുറങ്ങുവാൻ
ചമഞ്ഞ്നടക്കുവാൻ
വഴിയുംതേടിത്തേടിനടപ്പൂ-
വന്നെത്തിയ താത്മനാശത്തിന്റെ
യശാന്തിത്താഴ്‌വാരത്തിൽ
ആരെന്റെ ശത്രു-നീയോ?
നീയല്ലെൻമാനസം മാത്രം
അതിൽവാർത്തടച്ചിട്ട സ്വപ്ന
സൗധത്തിൽ കൂടിവാർത്തുവെച്ചിടും
ദുഷ്ടദുർമ്മത്തവികാരങ്ങൾ മേയുന്നകാലത്തോളം

ഞാൻ തന്നെ എന്റെശത്രു,
എന്റെ ജീവന്റെ ശത്രു
നിന്റെ ജീവന്റെ ശത്രു
ഈ സമൂഹത്തിന്റെ ശത്രു
മർത്ത്യലോകത്തിൻശത്രു
ഈപ്രപഞ്ചത്തിൻശത്രു.