Followers

Wednesday, April 14, 2010

ഒരു കുഞ്ഞിക്കരച്ചിലിന്റെ മാറ്റൊലിയിൽ



kayyummu kottappadi
ചുടുനിശ്വാസങ്ങളുടെ വേദനയിൽ
ഊറിക്കൂടിയ കവിതകൾ
നുള്ളിക്കളയാനുള്ളതായിരുന്നില്ല
ജഢചുമക്കുന്നവന്റെ മുന്നിൽ
ഈണം പതിഞ്ഞ നിലവിളികൾ
ഒറ്റപ്പെട്ട മൗനവുംപേറി
തോറ്റുകളയാനുള്ളതായിരുന്നില്ല....
ഉന്തുവണ്ടിപോലെ
ഉന്തിനീക്കാനായിരുന്നില്ല,
മോഹിച്ചുണർത്തിയ സംത്രാസങ്ങൾ....
ഞങ്ങൾ കരുതിവെച്ച സ്വപ്നങ്ങൾ....
മണിയറയുടെ കിനാക്കളും മോഹങ്ങളും
ഒരു താലിച്ചരടിന്റെ സമ്മോഹനതയിൽ
ബലിയർപ്പിയ്ക്കപ്പെടാനുള്ളതായിരുന്നില്ല...
ഒടുവിലിപ്പോൾ-
ഗർഭപിണ്ഡത്തിന്റെ സ്പന്ദിക്കുന്ന ഹൃദയമിടിപ്പിൽ
ഒരേയൊരു ചോദ്യമേയുള്ളു,
നീയതിനെ കൊന്നുമൂടാത്തതെന്ത്‌?
നീയതിനെ കൊന്നുമൂടാത്തതെന്ത്‌?
ഇനിയിപ്പോൾ-
പ്രണയത്തിനു മുൻപിൽ കുറ്റപ്പെടുത്തലുകളും
ചോദ്യങ്ങളുമില്ലാത്ത
ഒരു കുഞ്ഞിക്കരച്ചിലിന്റെ
മാറ്റൊലിയിൽ....
ഞാൻ കണ്ടു,
ഒരു കുഞ്ഞിവിരൽ എനിക്കുനേരെ
നീണ്ടുനീണ്ടു വരുന്നത്‌!