ശിരസ്സു താഴ്ത്തുന്നു ഞാന്‍...
ഇനി,എന്റെയവസാന ലോകവുമളക്കുക..
ഇതിലുണ്ടോരാത്മാവുതന്‍ ജലയാത്രകള്‍
ഇതിലുണ്ട് മറ്റാരുമറിയാത്ത സത്യങ്ങള്‍....
ഇതിലുണ്ട് കനിവും,കിനാവും,വിഷാദവും
ഇതിലുണ്ട് നിലയറ്റ മൌനവും ,മറവിയും,
ഒരു സൂര്യന്‍,ആകാശം,എഴുകടല്‍, കാടുകള്‍
ഇതിലുണ്ട്,സംഗരങ്ങള്‍ , മഹായാനങ്ങള്‍
അവിടുന്നു മൂന്നുലോകങ്ങളുമളന്നിട്ടു -
മറിയാതെ പോയ ചിലദിക്കുകള്‍,ദൂരങ്ങള്‍....
ഇനി,യളന്നോളുക ,ശിരസ്സു താഴ്ത്തുന്നു ഞാന്‍;
അറിയുകില്ലടിയന്റെയപരാധമിതുവരെ.
ചെറുനാഴി,കള്ളപ്പറ,ചതി,പൊളിവചന-
മിവയോന്നുമില്ലാത്ത ലോകം കൊതിച്ചതോ?
ഇവന്‍ ,അസുരനെന്നാര്‍ വിധിച്ചു?സ്വര്‍ഗ്ഗത്തിന്റെ
അധിപതികളവര്‍ മാത്രമെന്നാര്‍ വരം നല്കി?
അവരെഴുതിവെയ്ക്കും ചരിത്രങ്ങളില്‍,ചോര-
കിനിയുന്ന സത്യങ്ങള്‍ പാതാളമാര്‍ന്നിടാം;
അവതാരചരിതങ്ങളിനിയുമുണ്ടായ് വരാം
അതിലായിരംമഹാബലിമാരുയിര്‍ത്തി ടാം
ചുവടുവെച്ചോളുക;മിഴിപൂട്ടിടട്ടെ ഞാന്‍...
അതല വിതലങ്ങളോവാതില്‍ തുറക്കുന്നു?
അരുത് പോകരുതെന്ന് കിളികളും പുഴകളും
അരുത് പോകരുതെന്ന് മിഴികളും ,മൊഴികളും....
വരികയാണെന്‍ കൂട്ടിനൊരുകുടന്നപ്പൂക്കള്‍
വരികായാണെന്‍ കൂട്ടിനായിളം തുമ്പികള്‍...
വരികയാണൂഞ്ഞാലിലാടുംകിനാവുകള്‍
ചെറുകറുക ,പൂത്തുമ്പ,നന്തുണിപ്പാട്ടുകള്‍
പുലരിത്തുടിപ്പുകള്‍,സാന്ധ്യ മേഘങ്ങള്‍,പൂ-
മണമുള്ള തെന്നല്‍.പൊന്നമ്പിളിനിലാക്കുളി
ഇനി, സമര്‍പ്പിക്കട്ടെ
ബലിയായ് വചസ്സ്
ഇനിയും വരാന്‍
കൊതിക്കൊള്ളും മനസ്സ്....
ഇത് ബലിക്കല്ലിലെ -
ച്ചോരക്കിനാവ്
ഇതില്‍ നിന്നുയിര്‍ക്കട്ടെ
ഒരു കനക സൂര്യന്‍.....
--
