ചോദ്യം

പാലാ ടി.ജെ.വർക്കി

നെഞ്ചിലെ
നിബിഡവർണ്ണം
മുറിക്കവെ
നിൻ
വിരലുകൾ
വിറയാർന്നത്തെന്തേ....?
മിഴികളിൽ
മൗനം
തുടികൊണ്ടതെന്തേ...?
ശോകം
ജ്വലിക്കും
നിൻമിഴികളിൽ
ദഹിക്കുന്ന-
തറിയാത്തതെന്തേ.....?
മൗന
നോവുടുത്താടുമ്പൊഴും
ജീവനോടൊരു
ഗോ‍ൂഢ
മന്ദസ്മിതം
കളവായ്‌
ഒട്ടിച്ചതെന്തേ....?

നേരുകൾ

പാലാ ടി.ജെ.വർക്കി

നിങ്ങളോ-
എൻ മൗനഗഹനാംബരങ്ങളിൽനിന്നും
പുറപ്പെട്ടുവന്നവർ,
ശൂന്യത കൈവച്ച്‌, കാൽവച്ച്‌
ദേഹവും രൂപവും
വച്ചെന്റെ ചുറ്റും നിരന്നവർ...!
എന്റെ പൊന്നുമക്കൾ....!
എന്നിടനെഞ്ചിലൂറും
നിമിഷദുഗ്ദ്ധങ്ങളാൽ
പോറ്റാം ഞാൻ
നിങ്ങടെ കാലത്രയം....
എൻകൈവെള്ളതൻ
അപാരതയാൽ
നിങ്ങടെ കിനാക്കളേയും....

എങ്കിലുമോർക്കുക...
ഭൂമിയാണിത്‌,
കറങ്ങുന്ന ഗോളമാണ്‌,
എല്ലാം ചാഞ്ഞും ചരിഞ്ഞും
ഉലഞ്ഞുമാണിവിടെ....!
ജൈവമീ
ചെഞ്ചായച്ചില്ലുകൂട്ടിലെ
വാപിളർന്ന നേരുകൾ
നാമൊരുമയായ്‌
ചെറുക്കേണ്ടത്‌;
മോഹങ്ങളും
പിന്നെ ഭംഗങ്ങളും
നാമൊരുമയായ്‌
പകുക്കേണ്ടതും....

ചാറ്റൽ മഴ

pala t j varkey

ഇഴകൾ പൊട്ടി-
യനാഥനായ്‌ ഇതാ...നീ
എൻ നെഞ്ചിന്നി-
രുകയിലായ്‌
കീറിപ്പോയ
ഗീതകം....!
ഇടറിയവാക്കി-
ന്നിടനെഞ്ചിലായ്‌ നിൻ
തുടിയറ്റ പൊരുളുകൾ.....!
ദുരകൾ തീർത്ത
ഹരിതകിനാചിതയിലോ
ഒരു നാൾ
നാം കൊറിച്ച
കിനാനുറുങ്ങുകൾ....
നിലാമഴ പുതപ്പിച്ച
ഹൃദയപ്പൊരുളുകൾ
ഇതാ...
ചാറ്റൽമഴയുടെ പുസ്തകത്തിലും
കടൽ വിയർത്ത
മേഘദൂതുകൾ....
കരൾ പിടഞ്ഞ
പ്രണയനോവുകൾ.....

സ്നേഹം

pala t j varky

സ്നേഹം
നിന്റെ മൗനങ്ങളിൽ
ഞാൻ സ്ഫുടമായ്‌
വായിച്ചെടുത്തത്‌-
വാക്കുകളുടെ
മറവിലും
ചരുവിലും
അറിയാതെ
ഒളിമിന്നിയത്‌-
ഒരു നോക്കിന്റെ
നൂൽപ്പാലവും കടന്ന്‌
നെഞ്ചിൽ
മൗനമായ്‌ വന്നു
ചേക്കേറിയത്‌-
ദൈവം കലർന്ന
നിമിഷനിലാപ്പൊട്ട്‌....
കാലത്തിന്റെ
സത്തയിൽ
വസന്തം
മൃദുവായ്‌
കോറിയിട്ട
മഞ്ചാടിയുടെ
ഹൃദയപ്പാട്‌....!

ഒറ്റസംഖ്യ

pala t j varkey

ഇതാ നിൻ

ചക്രവാളങ്ങളിൽ

ഞാൻ കോറിയ

കവിതകൾ-

ബാഷ്പധൂളികൾ

കൂട്ടിത്തുന്നി

ഏഴു വരികളിൽ

നിന്നുയിരുമേഞ്ഞ

കിനാസ്ഥലിയിതാ-

വാഴ്‌വാടിയ

നിറലീലയിതാ-

ജീവൻ പിടഞ്ഞ്‌

നോവിൽ കുളിച്ച്‌

സ്പന്ദകുടിയിലെ

തിരിനാളമിതാ...

കരളുവാറ്റിയ

വാക്കിനും,

വിങ്ങിയുണരും

പൊരുളിനും

എന്റെ മാത്രം ഛായ...!

കണവ്യൂഹങ്ങളുറഞ്ഞാടും

വഴികളും, ഉയിരും,

ഉയിരിന്നിരുളാറ്റിയ

ലിപികളും

കൂട്ടിയാലോ

ഞാനാകുമൊറ്റസംഖ്യ....!