പാലാ ടി.ജെ.വർക്കി
നിങ്ങളോ-
എൻ മൗനഗഹനാംബരങ്ങളിൽനിന്നും
പുറപ്പെട്ടുവന്നവർ,
ശൂന്യത കൈവച്ച്‌, കാൽവച്ച്‌
ദേഹവും രൂപവും
വച്ചെന്റെ ചുറ്റും നിരന്നവർ...!
എന്റെ പൊന്നുമക്കൾ....!
എന്നിടനെഞ്ചിലൂറും
നിമിഷദുഗ്ദ്ധങ്ങളാൽ
പോറ്റാം ഞാൻ
നിങ്ങടെ കാലത്രയം....
എൻകൈവെള്ളതൻ
അപാരതയാൽ
നിങ്ങടെ കിനാക്കളേയും....
എങ്കിലുമോർക്കുക...
ഭൂമിയാണിത്‌,
കറങ്ങുന്ന ഗോളമാണ്‌,
എല്ലാം ചാഞ്ഞും ചരിഞ്ഞും
ഉലഞ്ഞുമാണിവിടെ....!
ജൈവമീ
ചെഞ്ചായച്ചില്ലുകൂട്ടിലെ
വാപിളർന്ന നേരുകൾ
നാമൊരുമയായ്‌
ചെറുക്കേണ്ടത്‌;
മോഹങ്ങളും
പിന്നെ ഭംഗങ്ങളും
നാമൊരുമയായ്‌
പകുക്കേണ്ടതും....
