നിർവ്വചനം

b t anilkumar

മിത്രമേ
മിടിക്കുന്ന ഹൃദയം തുരക്കുക
കാണാതെ വന്നെൻ കാതിൽ
കാരീയമിറ്റിക്കുക
എപ്പൊഴും നിഴലായെ-
ന്നൊപ്പമേ നടക്കുക
കണ്ണിന്റെ തിളക്കങ്ങൾ
കട്ടു നീ കതിർക്കുക
നാവിന്മേൽ പാഷാണത്തിൻ
പാരുഷ്യം പുരട്ടുക
ഉറ്റവൻ ഞാനെന്നാലു-
മൊറ്റു നീ കൊടുക്കുക
പാപത്തിൻ പണം കൊണ്ടു
പാനോപചാരം ചെയ്‌ക
മിത്രമാണെന്നാലും നീ
സ്നേഹിക്കുന്നുമുണ്ടാവാം
അല്ലെങ്കിൽ നിഴലായെ-ന്നൊപ്പമേ നടക്കുക